Ба намояндагии Хадамоти муҳоҷирати назди президенти Тоҷикистон дар Русия оид ба қатли шаҳрванди Тоҷикистон маълумот расидааст. Як зан – шаҳрванди Русия, ки аз ифшои номаш худдорӣ кардааст, бо тел ефон занг зада, дархост намудааст, ки ба қазияи мазкур расидагӣ кунанд.

Тавре ба ОИ «Азия-Плюс» аз хадамоти матбуоти намояндагии ХМ дар Русия хабар доданд, кормандони хадамот ба макони ҳодиса – шаҳри Любертсии вилояти Маскав рафта, ошкор сохтаанд, ки рӯзи 25-уми ноябр дар кӯчаи Киров миёни шаҳрванди Тоҷикистон Зокир Қурбонқулови 31-сола, сокини шаҳри Душанбе ва як шаҳрванди Русия, сокини шаҳри Саранск нофаҳмӣ рух дода, ҷанҷол мешавад.

«Баъди чанде, тахминан соатҳои 21:00 ҳамсояҳо З.Қурбонгулови ҷароҳатбардоштаро дида, бародари ӯ – Маҳмадҷонро огоҳ месозанд. Мошинии ёрии таъҷилии тиббӣ ҷароҳатбардоштаро ба беморхонаи марказии шаҳр интиқол додааст, вале соатҳои 2-и шаб ӯ аз захмҳои гирифтаи корд ба ҳалокат расидааст», - гуфтанд дар намояндагии хадамот.

Бино ба иттилои манбаъ, аз рӯйи ин далел мутобиқи моддаи 105-и Кодекси ҷиноии Русия парвандаи ҷиноӣ боз шудааст.

«Гумонбаршуда дар содир намудани ҷинояти мазкур, сокини шаҳри Саранск боздошт шуда, корҳои тафтишотӣ бурда мешаванд. Айни замон намояндагии Хадамоти муҳоҷирати Тоҷикистон дар Русия ҷиҳати кумак расонидан ба оилаи фавтида чораҳо андешида, ҷараёни тафтишоти парвандаи ҷиноии мазкурро таҳти назорат қарор дорад», - афзуд манбаъ.