Мақомоти ҳифзи ҳуқуқи ноҳияи Қубодиёни вилояти Хатлон 6 тан аз ҷонибдорони Ҳаракати исломии Ӯзбекистон (ҲИӮ)-ро боздошт намуданд.

Раиси ноҳияи Қубодиён Абдумӯмин Улфатов зимни нишасти матбуотӣ дар ин робита изҳор намуд, ки тайи ду моҳи ахир кормандони мақомоти интизомии вилояту ноҳия шаш сокини деҳаи Қизил Нишони ҷамоати Янгийӯли ноҳияро ба гумони узвият дар ҲИӮ дастгир кардаанд.

«Ба хотири халал ворид насохтан ба ҷараёни тафтишот, мо алҳол ному насаби онҳоро ифшо карда наметавонем ва бо итмоми тафтишот, тамоми маълумоти зарурӣ ба ВАО пешниҳод хоҳад шуд», - иброз дошт вай.

Ба қавли раиси ноҳия,  соли гузашта низ 5 нафар сокинони ҳамин деҳа ба гумони узвият дар ҲИӮ боздошт шуда маҳкум гардида буданд ва аз ин рӯ, як гурӯҳи корӣ таъсис ёфта, бо аҳолии деҳаи мазкур корҳои фаҳмондадиҳӣ гузаронида шуданд.

А. Улфатов мегӯяд, аслан инҳо ҷавононе мебошанд, ки дар Русия ба доми фиреб афтода, сипас барои таълим ба курсҳои махсуси омодагии ҷангӣ ба кишварҳои хориҷӣ дур сафарбар карда мешаванд. «Айни замон вазъ таҳти назорати мақомоти ҳифзи ҳуқуқ қарор дорад», - итминон дод раиси ноҳия.