Дар фурудгоҳи Борисполи шаҳри Киев собиқ нахуствазири Тоҷикистон Абдумалик Абдуллоҷонов боздошт шуд.

Бино ба маълумоти бахши тоҷикии хабаргузории Би-Би-Сӣ, ӯ аз ИМА ба Украина сафар доштааст. Сабаб ва ҷузъиёти боздошти Абдуллоҷонов ҳанӯз дақиқ шарҳ дода намешаванд.

Дар ҳамин ҳол, ба ОИ «Азия-Плюс» дар Прокуратураи генералии ҶТ ин далелро на тасдиқ сохтанду на рад, вале манбаъ таъкид намуд, ки Абдуллоҷонов барои кӯшиши табаддулоти давлатӣ мавриди пайгарди қонунии байнулмилалӣ эълон шуда буд.

Номи Абдумалик Абдуллоҷонов дар рӯйхати афроди аз ҷониби Тоҷикистон мавриди ҷустуҷӯ қарордоштаи Интерпол низ мавҷуд аст, аммо дар он ҷо ӯ ҳамчун Абдулоҷон Абдулоҷонов зикр гардидааст. Ӯ ҳамчун гумонбар ба ҷинояткории муташаккил ва терроризм мавриди пайгард қарор дорад.

Абдумалик Абдуллоҷонов яке аз шахсони маъруфи солҳои 90-и асри гузаштаи Тоҷикистон маҳсуб меёбад. Соли 1992 ӯ нахуствазири Тоҷикистон таъин шуда, дар ин мансаб то моҳи декабри соли 1993 фаъолият дошт. Ӯ ҳамчунин ба ҳайси сафири Тоҷикистон дар Русия низ ифои вазифа намудааст.

Пас аз шикаст дар маъракаи интихоботи президентӣ дар соли 1994 ӯ Тоҷикистон тарк намуда, дар кишварҳои Ғарб зиндагӣ мекард.

Ҳамчунин тибқи маълумоти мақомоти ҳифзи ҳуқуқи Тоҷикистон, Абдуллоҷонов дар маблағгузории ошӯби полковник Маҳмуд Худоёбердиев низ гумонбар дониста мешавад, ки соли 1998 дар минтақаи шимоли ҷумҳурӣ фурӯ нишонда шуда буд. Солҳои ахир ӯ дар Лос-Анҷелеси ИМА ба сар мебурд.

Моҳи ноябри соли гузашта боз номи ӯ дар ВАО пайдо шуд. Мусоҳибаи ӯ дар бахши тоҷики сомонаи радиои Озодӣ ба табъ расид. Пайдо шудани Абдуллоҷонов дар сафҳаҳои матбуотро коршиносон ба маъракаи интихоботи президентии қарибулвуқӯъ дар Тоҷикистон рабт дода буданд.