Як корманди мақомоти пулиси вилояти Твери Русия дар муноқишаи сари роҳ бо се нафар мард аз аслиҳаи ҷароҳатдеҳ истифода намуда, бар асари он ду нафар мунтақили бемористон ва ба ду тани дигар дар ҷойи ҳодиса кӯмаки тиббӣ расонида шудааст. Дар ин бора як манбаъ аз мақомоти ҳифзи ҳуқуқи ин минтақа иттилоъ додааст.

Московский комсомолетс менависад, қарибиҳои шоми рӯзи шанбе дар кӯчаи Пролетарскии шаҳри Твер корманди 33-солаи фаврӣ, майори пулис бинобар сабаби роҳ додан ба гузаштани автомашина бо се нафар шаҳрванди Тоҷикистон – марди 54-сола ва писарони 29 ва 31-солаи ӯ ба муноқиша даромехта, он то ба ҷанҷол расидааст ва пулис аз аслиҳаи худ истифода кардааст.

Ӯ ҳамчунин зикр кардааст, ки зимни ҷанҷол ба ҳарифони ӯ муяссар шудааст, ки аслиҳаи ӯро гиранд ва ба сӯяш чанд тир холӣ кунанд.

Ду нафар шаҳрванди Тоҷикистон ба бемористон бистарӣ ва боз ба ду тан аз иштирокчиёни муноқиша дар ҷойи ҳодиса кӯмаки тиббӣ расонида шудааст. Манбаъ зикр кардааст, ки корманди пулис ҳушёр буда, машрубот истеъмол накардааст.

Дар ҳамин ҳол, хабаргузории РИА Новости иттилоъ медиҳад, ки дар маркази матбуоти ВКД Русия ин далелро тасдиқ намуда, хабар додаанд, ки аз рӯи он санҷиши хидматӣ ҷараён дорад ва дар сурати муайян шудани айби корманди пулис, нисбати ӯ чора андешида хоҳад шуд.

Бино ба маълумоти Раёсати минтақавии ВКД, корманди пулис ба гаражи воқеъ дар кӯчаи Пролетарский омада, аз чор нафари дар роҳ истода дархост мекунад, ки ба каноре раванд, вале онҳо розӣ нашуда, ба таҳқири корманд пардохтаанд. «Сипас ӯ автомашинаи худро гузошта, пиёда ба гараж ворид шудааст. Ин чор нафар низ аз паси ӯ равона шуда, дар гараж табареро дарёфт ва бо он ба сари корманди пулис зарба задаанд», - гуфта мешавад дар хабар.