Дар рӯзҳои таҷлили ҷашни Истиқлолияти давлатиаш Ӯзбекистон ба муддати се рӯз марзҳояш бо Тоҷикистонро мебандад.

Тавре ба ОИ «Азия-Плюс» сардори маркази матбуоти Сарраёсати нерӯҳои марзбонии КДАМ ҶТ Хушнуд Раҳматуллоев хабар дод, мувофиқи огоҳиномаи ҷониби Ӯзбекистон, аз 1 то 3-юми сентябр посгоҳҳои иҷозати равуои шаҳрвандон ва нақлиёти марзи Тоҷикистону Ӯзбекистон баста мешаванд.

«Қирғизистон дар бораи баста шудани марзаш бо Тоҷикистон дар остонаи таҷлили ҷашни Истиқлолияти давлатиаш то ҳол моро огоҳ накардааст», - гуфт Раҳматуллоев.

Қобили зикр аст, ки Ӯзбекистон ҷашни Рӯзи Истиқлоли давлатиро 1-уми сентябр ва Қирғизистон – 31-уми август таҷлил мекунанд.