Дар марзи Тоҷикистону Қирғизистон дар минтақаи шимоли ҷумҳурӣ посбонгоҳи нави «Боғдорӣ»-и нерӯҳои марзбонии Тоҷикистон ба истифода дода шуд.

Тавре ба ОИ «Азия-Плюс» аз ҳукумати шаҳри Исфара хабар доданд, сохтмони посбонгоҳ моҳи сентябри соли 2011 бо дастгирии молиявии КВД «Тоҷикаэронавигатсия» оғоз гардида, ҳаҷми корҳои сохтмонӣ беш аз 5 млн. сомониро ташкил дод. Корҳои сохтмонӣ аз ҷониби ҶДММ «Маскан»-и шаҳри Исфара ба иҷро расонида шуданд.

«Иншоот бо назардошти меъёрҳои муосир бунёд гардида, аз бинои маъмурӣ, манзили зисту будубоши сарбозону афсарон, биноҳои хоҷагидорӣ, дегхона, майдони варзишӣ ва қароргоҳи нигоҳдории сагҳои хизматӣ иборат аст», - гуфт манбаъ.

Гуфта мешавад, бо мақсади таъмини марзбонон бо сабзавоту меваи тару тоза барои ташкили хоҷагии ёрирасон 1,5 гектар қитъаи замин ҷудо карда шудааст.

«Дар маросими ифтитоҳи посбонгоҳи нав сардори Ситоди кулли Сарраёсати нерӯҳои марзбонии КДАМ ҶТ Шараф Файзуллоев, сардори Раёсати нерӯҳои марзбонӣ дар вилояти Суғд Ҳикматулло Пираков, муовини раиси вилояти Суғд Мӯбинҷон Қаюмов, раиси шаҳри Исфара Раҳмоналӣ Амиров ва аҳли ҷомеа ҳузур доштанд», - афзуд сарчашмаи хабар.