Шоми рӯзи 26-уми октябр зимни таваққуфи техникӣ дар истгоҳи Терновкаи роҳи оҳани Русия қатораи хатсайри Маскав-Душанбе мавриди ҳамла қарор гирифтааст.

Бино ба иттилои намояндаи расмии сафорати Тоҷикистон дар Русия Муҳаммад Эгамзод, ҳамлаи ногаҳонӣ аз ҷониби як гурӯҳи иборат аз 20 нафар шахсони славянитабор сурат гирифта, 20 шишаи тирезаи вагонҳо шикаста ва ба чанде аз мусофирон осеби сабуки ҷисмонӣ расонида шудааст.

Ба гуфтаи ӯ, ҳангоми ҳамла дашному таҳқир ва таҳдидҳои миллатгароёна ба унвони мусофирони қатора садо додаанд. «Кормандони пулиси маҳаллӣ дар нақлиёт ва кормандони истгоҳ, ки дар он ҷо ҳузур доштанд, худро канор гирифта, ҷиҳати пешгирии ин ҳодиса ҳеҷ чорае наандешидаанд», - гуфт ӯ.

Намояндаи сафорат таъкид дошт, ки бригадири қатора кӯшиш кардааст, ки дар бораи ин ҳодиса ба ба истгоҳи ояндаи Волгоград барқия ирсол намояд, вале барқияи ӯро бо баҳонаи миёни Тоҷикистону Русия мавҷуд набудани шартнома дар ин хусус қабул накардаанд.

Ба қавли Эгамзод, гузашта аз ин, ду корманди хадамоти назорати амният дар роҳҳои оҳани вилояти Астрахан, ки  қатори Тоҷикистонро аз Маскав то марзҳои Русия (истгоҳи Оқсарой) ҳамроҳӣ мекарданд, низ ҳеҷ чорае наандешида, хадамоти дахлдорро аз ин рӯйдод огаҳ накардаанд.

«Дар ин робита сафорати Тоҷикистон тавассути роҳҳои дипломатӣ ба Русия муроҷиат намуда, тафтиши мӯшикофонаи ин падидаи қавмгароӣ ва ҷуброни зарари моддии расида ба КВД «Роҳи оҳани Тоҷикистон»-ро дархост кард», - афзуд номбурда.