Президенти Қазоқистон Нурсултон Назарбоев ҳафтаи гузашта қонун «Дар бораи тасдиқи Созишномаи миёни ҳукумати Қазоқистон ва ҳукумати Тоҷикистон дар бораи кӯмаки ҳарбӣ-техникии бебозгашт»-ро ба имзо расонид.

Созишномаи мазкур миёни ҳукуматҳои кишварҳо санаи 15-уми апрели соли 2013 дар Душанбе ба тасвиб расида буд.

Бино ба иттилои хадамоти матбуоти сарвари давлати Қазоқистон, мутобиқи шартҳои созишнома, Қазоқистон ба Тоҷикистон ба сифати ба ихтиёри ин кишвар ройгон супурдани амволи низомӣ, аз қабили тиру муҳимот, норинҷакҳои дастӣ ва равғани молиданӣ барои аслиҳа кумаки ҳарбиву техникӣ мерасонад.

Гуфта мешавад, то ба Душанбе расонидани амволи низомиро Қазоқистон ба дӯши худ мегирад. Дар банди 5-уми созишнома муқаррар шудааст, ки амволи низомии аз Қазоқистон дастрасшуда ва ҳуқуқҳо ба истифодаи онро Тоҷикистон ба ихтиёри ҷониби сеюм намедиҳад.