Аввали ҳафтаи равон дар суди ноҳияи Синои пойтахт мурофиаи судӣ нисбати табибони гиторнавози гурӯҳи «Парем» Ҳакимҷон Ҳазратқулов, ки аввали моҳи апрел дар шуъбаи эҳёгарии Маркази миллии тиббӣ (Қарияи Боло) ҳалок шуд, оғоз гардид.

Тавре ба ОИ «Азия-Плюс» як манбаъ аз суди ноҳияи Сино хабар дод, дар курсии ҷавобгарӣ мудири шуъбаи эҳёгарии Маркази миллии тиббӣ Илҳом Носиров ва табибони шӯъба Шуҳрат Бобоев ва Осаф Сафаров қарор доранд. Рӯзи ҷумъа аз музокироти ҷонибҳо дар мурофиа интизорӣ меравад.

Рӯзи 17-уми марти соли ҷорӣ Ҳазратқулов бо ҷароҳати мағзи сар ба бинои 5-уми шуъбаи эҳёгарии Маркази миллии тиббӣ оварда шуда, баъди гузашти 43 рӯз дар ин шуъба фавтид.

Ҳарчанд ташхис ва муолиҷа дар ин шуъба ройгон аст, баргузории ҷараёни табобат ба зиммаи Илҳом Носиров ва зертобеъони ӯ вогузор шуда, аммо бо маслиҳати пешакӣ ва истифода аз вазъи душвори волидайни бемор, табибон падари нафақахӯри ӯ -  Муродқул Ҳазратқуловро маҷбур мекунанд, ки барои муолиҷа ва харидани доруворӣ маблағи пулӣ пардохт намояд.

Ҳамин тариқ, Илҳом Носиров муддати 43 рӯз аз падари бемор ба сифати пора 10 ҳазору 470 сомонӣ маблағи пулӣ гирифтааст. Барои харидани доруворӣ, ташкили навбатдорӣ, таъмин бо ғизо ва ғайра падари Ҳазратқулов дар маҷмӯъ 104 ҳазор сомонӣ маблағ хароҷот намудааст.

Пас аз фавти бемор дар шуъбаи эҳёгарӣ, Муродқул Ҳазратқулов ба Илҳом Носиров муроҷиат намуда, аз ӯ дархост мекунад, ки як қисмати маблағҳои ба сифати мукофотпулӣ барои табобати «пурсамари» писараш гирифтаро баргардонад. Санаи 16-уми июл Носиров дар ҳуҷраи кории худ як қисмати маблағи пулӣ дар ҳаҷми 2 ҳазор сомониро ба Ҳазратқулов баргардонида, ин ҳангом аз ҷониби кормандони Агентии зиддифасод дастгир шудааст. Аз ҳамкорони ӯ барои тарк накардани маҳалли зист баёнот гирифта шуд.

Нисбат ба табибон мутобиқи моддаи 324-и КҶ ҶТ (Гирифтани мукофот бо роҳи тамаъҷўӣ) парвандаи ҷиноӣ оғоз гардид.