Зимни амалиёти имрӯз доиргардидаи марзбонони тоҷик дар ҳамдастӣ бо хадамоти марзбонии Афғонистон сокини деҳаи Зардолуи ноҳияи Шӯрообод Мирмад Баротов, ки рӯзи 10-уми ноябр аз ҷониби қочоқбарони афғон ба гарав гирифта шуда буд, аз асорат озод карда шуд.

Сардори маркази матбуоти Райсати нерӯҳои марзбонии КДАМ ҶТ Хушнуд Раҳматуллоев ба ОИ «Азия-Плюс» дар ин робита иттилоъ дод, ки М.Баротов аз ҷониби як гурӯҳи нашъаҷаллобони афғон таҳти раҳбарии сокини деҳаи Ғундиёни вулусволии Шаҳри Бузурги вилояти Бадахшон Ғоиб валади Ғуломрасул, бештар маъруф бо лақаби «Кӯри Ғоиб» ба асорат гирифта шуда буд.

«Қочоқбарони афғон шаҳрванди Тоҷикистонро дар ағбаи кӯҳии душворгузар, дар қаламрави Шӯрообод дар гарав нигоҳ медоштанд», - иброз дошт Раҳматуллоев ва илова намуд, ки амалиёти поксозии қаламрави ноҳияи Шӯрообод аз қочоқбарони афғон идома дорад.