Дар маркази миллии байниидоравии кинологияи Агентии назорати маводи нашъаовари назди Президенти ҶТ аз 2 то 14 декабри соли ҷорӣ курсҳои навбатии омӯзишӣ барои кормандони Хадамоти Гумруки назди Ҳукумати Ҷумҳурии Тоҷикистон баргузор шуда истодааст. Курсҳоро дастурдеҳон - кинологҳои Агентӣ дарс дода истодаанд.

Бино ба маълумоти маркази робита бо ҷомеаи Агентӣ, барномаи маҷмӯӣ - таълимии курс дар худ табодули афкор оид ба дониши андухтаи иштирокчиён дар курсҳои гузаштаи таълимӣ  оид ба тамрини сагҳои хизматӣ ҷиҳати пайдо кардани воситаҳои нашъадорро дар бар мегирад.  Инчунин, дар тренинг ба кинологҳо омӯзонидани хусусиятҳои анатомӣ ва физиологии сагҳои хизматӣ, асоси нигоҳубини онҳо, пешгирӣ ва расонидани ёрии аввалин дар ҳолатҳои фавқуллода  ба сагҳои хизматӣ аз тарафи кинологҳо омӯзонида мешавад.

Илова бар он, дар давраи курсҳо мавзӯҳои дар сагҳо ташаккул додани   рефлексҳои шартӣ ва ғайришартӣ, ғариза (инстинкт), усул ва методҳои тамрини сагҳои хизматӣ, омӯхтани системаи олии фаъолияти  асаби онҳо ва кумаки байторӣ (ветеринарӣ) ба нақша гирифта шудаанд.

Курси омӯзишӣ имконият медиҳад сатҳи дониши тахассусии мутахассисон-кинологҳои хадамоти гумрук баланд бардошта шавад, инчунин онҳоро ба иҷрои функсияҳои нав дар соҳаи кинологияи хизматӣ омода менамояд.Дар хотимаи курсҳо ба ширкаткунандагон сертификатҳо дода хоҳанд шуд.