Дар Тоҷикистон рақамҳои давлатии чипдор барои автомашинаҳо ҷорӣ шуданд, ки дорои маълумот дар бораи автомобил ва соҳиби он мебошанд.

Тавре ба ОИ «Азия-Плюс» як манбаъ аз Раёсати БДА ВКД Тоҷикистон хабар дод, рақамҳои нав дар баробари рақамҳои пешина амал мекунанд. «Чанде қабл «Тоҷикстандарт» ба рӯйхати аломати рақамҳои Тоҷикистон маълумоти нав оид ба рақамҳои автомобилро ворид намуд», - гуфт манбаъ.

Ба иттилои сарчашмаи хабар, рақамҳои нав аз рақамҳои пешин бо он фарқ мекунанд, ки дар онҳо чипҳо насб шуда, зоҳиран рақамҳо бузургтар менамоянд ва зери парчам дар рақами автомбил электрочип гузошта шудааст.

«Ин ба таъмини бехатарии ҳаракати нақлиёт дар роҳҳо, пешгирӣ ва саривақт ошкор намудани вайрон кардани қоидаҳои ҳаракати роҳ мусоидат карда, минбаъд нозирони роҳ барои дастрас кардани маълумот дар бораи воситаи нақлиёти мушаххас аз дастгоҳҳои махсус истифода карда метавонанд», - афзуд манбаъ.