Қитъаи роҳи мошингарди Исфара - Ворух, ки рӯзи 18-уми декабр аз ҷониби сокинони мавзеи Оқсойи кишвари ҳамсояи Қирғизистон баста шуда буд, дубора боз гардид.

Гуфта мешавад, имрӯз дар пойтахти Қирғихистон оид ба ин масъала гуфтушуниди ҷонибҳо баргузор мешавад. Аҳолии мавзеъ ба тоза кардани роҳ аз сангу шағал шурӯъ намудааанд. Сокинони мавзеъи Оқсойи кишвари ҳамсоя баъди ваъдаи сохтмони роҳи алтернативии Оқсой-Тандик ба кушодани қитъаи роҳ розӣ шудаанд.

Ахири ҳафтаи сипаришуда иттилоъ дода будем, ки роҳи мошингарди Исфара - Ворух, ки рӯзи 18-уми декабр аз ҷониби сокинони мавзеи Оқсойи кишвари ҳамсояи Қирғизистон баста шуда буд, то ҳанӯз боз нашудааст.

Котиби матбуотии раиси шаҳри Исфара Иқбол Тешаев тариқи телефон ба ОИ «Азия-Плюс» дар ин робита иттилоъ дода буд, ки аз гуфтушунидҳои мақомоти раҳбарии шаҳри Исфара ва вилояти Суғд бо намояндагони ҳукумати вилояти Ботканд ва муовини нахуствазири Қирғизистон Токон Мамитов бобати боз кардани роҳи мошингарди Исфара-Ворух ҳеҷ натиҷае ҳосил нашудааст.