Раёсати корҳои дохилии вилояти Хатлонро болоравии сатҳи ҷиноят миёни ноболиғону ҷавонон ба ташвиш гузоштааст.

Чуноне муовини сардори РВКД дар вилояти Хатлон Толиб Назаров изҳор дошт, соли 2013 дар қаламрави вилоят 185 ҳолати даст ба ҷиноят задани ноболиғону ҷавонон ва сарбозони қисми ҳарбии мустақар дар қаламрави вилоят ба қайд гирифта шудааст, ки дар қиёс бо соли 2012 90 ҳолат зиёд мебошад.

«Ин  ҳолат моро ба ташвиш гузоштааст ва баҳри пешгирии ҷинояткорӣ дар байни ноболиғону ҷавонон ва сарбозони қисмҳои ҳарбӣ аз ҳисоби намояндагони РВКД, мақомоти иҷроияи ҳокимияти давлатии вилоят, мақомоти прокуратура ва гарнизони ҳарбии Қӯрғонтеппа гуруҳи кории муштарак ташкил намудем», - иброз дошт ӯ.

Ба қавли номбурда, аз ҷониби ин гурӯҳ дар мактабҳои миёна, донишгоҳҳо, омӯзишгоҳҳо ва қисмҳои  ҳарбӣ вохӯрию суҳбатҳо гузаронида мешаванд, ки ҳадаф аз онҳо пешгирии ба ҷинояткорӣ рӯ овардани ноболиғону ҷавонон аст.