Раиси ҲНИТ Муҳиддин Кабирӣ ва муовини аввали ӯ Саидумар Ҳусайнӣ, вакилони палатаи поёнии парлумон ба баррасии Маҷлиси намояндагони Маҷлиси Олии ҶТ лоиҳаи тағйироту илова ба Қонуни ҶТ «Дар бораи уҳдадории умумии ҳарбӣ ва хизмати ҳарбӣ»-ро пешниҳод карданд.

Ба андешаи онҳо, ин тағийрот ба куллан тағйир додани тартиби даъват ва хизмат дар атриши миллӣ имкон фароҳам сохта, ба падидаҳои манфие чун маҷбуран ба хизмат ҷалб кардан (облава) ва порадиҳӣ дар ин самт садд хоҳанд гузошт.

Саидумар Ҳусайнӣ ба «Азия-Плюс» дар ин робита изҳор кард, ки тағийроти пешниҳодшуда ба беҳбуди ҳифзи иҷтимоии хизматчиёни ҳарбӣ низ мусоидат намуда, барои бунёди артиши касбии Тоҷикистон замина фароҳам меоваранд.

«Мо пешниҳод кардем, ки ба сарбозони хизмати ҳатмии ҳарбӣ музди меҳнат таъин карда шавад, ки ҳаҷмаш аз музди миёнаи меҳнат дар кишвар набояд камтар бошад, - гуфт ӯ.

Ба қавли Ҳусайнӣ, ҳаҷми пардохтпулиҳои ҷавононеро, ки ба хизмат дар сафи Қувваҳои Мусаллаҳ хоҳиш надоранд, бояд ҳукумат муқаррар намояд ва ин маблағҳо барои таъини музди меҳнат ба сарбозон истифода шуда метавонанд.

«Ғайр аз ин, мо пешниҳод дорем, ки фонди махсуси ҷумҳуриявӣ оид ба дастгирии артиши миллӣ таъсис дода шавад, ки ба он пардохтпулиҳои дар боло зикршуда ва маблағҳои хайрияву ихтиёрӣ ҷамъоварӣ карда мешаванд», - зикр кард вакил.

Номбурда ҳамчунин гуфт, дар яке аз бандҳои тағйирот ба қонуни мазкур пешбинӣ мешавад, ки шахсоне, ки хизмати ҳатмии ҳарбиро адо накардаанд, ба қабул шудан ба кор дар  мансабҳои хизмати давлатии Тоҷикистон ҳуқуқ надоранд.