Ба автомашинаи консули Тоҷикистон дар музофоти Бадахшони Афғонистон Рустам Маҳмудӣ ҳамлаи мусаллаҳона сурат гирифт.

Тавре ба «Азия-Плюс» аз Вазорати корҳои хориҷии ҷумҳурӣ хабар доданд, ҳамлаи мусаллаҳона ба автомашинаи консул рӯзи 16-уми май дар вилояти Қундуз анҷом пазируфта, дар натиҷа Рустам Ма ҳ мудӣ аз дасти рост ва пояш захмӣ шудааст. «Айни замон консул дар бемористон бистарӣ буда, ӯро ҷарроҳӣ карданд. Аз рӯи ин ҳодиса тафтиш идома дорад», - гуфтанд дар ВКХ Тоҷикистон.

Бино ба маълумоти мақомоти пулиси Қундуз, то ҳанӯз ҳеҷ касе масъулияти ин ҳамларо ба дӯш нагирифтааст.

Қобили зикр аст, ки айни замон дар Кобул сафоратхонаи Тоҷикистон ва дар шаҳрҳои Мазори Шариф, Қундуз ва Файзобод консулгариҳои Тоҷикистон амал мекунанд.

Намояндаи пулиси Қундуз Саид Сарвар Ҳусайнӣ қаблан ба рӯзноманигорон иттилоъ дод, ки рӯзи ҷумъа, 16-уми май дар роҳи Бадахшон ба Қундуз автомашинаи консули Тоҷикистон маврди ҳамлаи мусаллаҳона қарор гирифтааст.