Чанде қабл дар пойтахти Қирғизистон – шаҳри Бишкек марҳилаи навбатии гуфтушуниди комиссияи байниҳукуматии Тоҷикистону Қирғизистон оид ба таъйин ва аломатгузорӣ дар марзи давлатии байни кишварҳо баргузор шуд. Дар ин бора ба «Азия-Плюс» як манбаъ аз ҳукумати ҷумҳурӣ хабар дод.

Ба иттилои манбаъ, ҳайати Тоҷикистонро дар ин гуфтушунид муовини нахуствазири ҶТ Муродалӣ Алимардон ва ҳайати кишвари ҳамсояро муовини нахуствазири Қирғизистон Ҷомарт Оторбоев раҳбарӣ кардаанд.

«Дар ҷараёни гуфтушунид масъалаҳои истифодаи муштараки роҳҳо, захираҳои обӣ, чарогоҳҳои наздимарзӣ ва ҳамчунин ҷараёни иҷрои тавофуқҳои қаблан ҳосилшуда оид ба сохтмони роҳу пулҳо баррасӣ шуданд», - гуфт манбаъ.

Зимнан зикр гардид, ки дар вохӯрӣ ҳамчунин масъалаи ташкили сафари нахуствазири Тоҷикистон Қоҳир Расулзода ба Бишкек низ матраҳ гардиданд, ки муҳлати он тариқи роҳҳои дипломатӣ мувофиқа карда мешавад.