Сокини деҳаи Овиёи ноҳияи Шӯроободи ҳаммарз бо Афғонистон Хушвахт Назриев 20-сола шаби 19 ба 20-уми июл аз ҷониби афроди мусаллахи номаълум гаравгон гирифта шуда, аз манзилаш ба самти номаълум бурда шудааст. Дар ин бора ба «Азия-Плюс» як манбаъ аз Сарраёсати нерӯҳои марзбонии КДАМ Тоҷикистон хабар дод.

Бино ба иттилои манбаъ, кормандони ниҳодҳои интизомии ноҳияи Шӯрообод ба ҷустуҷӯи ин афроди мусаллаҳ ва асорат озод кардани ҷавон сафарбар шудаанд.

«Тибқи яке аз фарзияҳо, ба қаламрави ҳамҷавори Афғонистон бурдани Хушвахт Назриев аз эҳтимол дур нест. Қобили зикр аст, ки аксар вақт сокинони ин ноҳияро қочоқбарони афғон мерабоянд, вале гаравгонгирии Хушвахт Назриев ҳодисаи нахустин дар соли равон аст», - гуфт сарчашмаи хабар.