Ҷасади Осияи панҷсола, ки рӯзи 8-уми август дар шаҳри Душанбе бедарак шуда буд, дар ноҳияи Ҳисор дарёфт шуд. Сабабҳои марги ӯ аз натиҷаҳои ташхиси судиву тиббӣ маълум хоҳанд шуд.

Тавре ба «Азия-Плюс» намояндаи ВКД Тоҷикистон Алиҷон Савров хабар дод, ҷасади духтарча рӯзи 13-уми сентябр дарёфт шудааст. Бино ба маълумоти ӯ, ҷасади духтарча дар яке аз ҷуйборҳои ноҳияи Ҳисор пайдо шуда, бинобар сабаби муддати тӯлонӣ дар зери об мондан вайрон шуда буд.

Радиои «Озодӣ» бо такя ба гуфтаҳои яке аз наздикони духтарча иттилоъ медиҳад, ки дар бораи дар дохили ҷӯйбор пайдо шудани ҷасади Осия зане, ки назди ҷуйбор иқомат дошт, хабар додааст. Ба гуфтаи наздикони Осия, пас аз ташхис кормандони милиса ҷасади духтарчарон ба онҳо додаанд ва рӯзи 14-уми сентябр ӯро ба хок супурдаанд.

Осия дар ҳуҷҷатҳои расмиаш бо номи Сабоҳат Диловарова сабт шуда, рӯзи 8 августи соли ҷорӣ аз назди хонаашон дар кӯчаи Айнӣ, воқеъ дар ноҳияи Шоҳмансури Душанбе, бедарак шуд. Духтарча бо модараш дар бинои манзили зисте иқомат дошт, ки моҳи марти соли гузашта хоҳарони гумшуда Малика ва Сабина Араловаҳо зиндагӣ мекарданд.

Бинои манзили зисте, ки аз он се нафар кӯдакон гум шуданд, ба КВД «Роҳи оҳани Тоҷикистон» тааалуқ дорад. Ҳавлии бино бо панҷара пӯшонида шуда, бедаракшавии духтарон аз ин ҳавлӣ натанҳо сокинони бино, балки тамоми шаҳри Душанберо нигарон кард.