Ба муносибати ҷашни солгарди навбатии таъсисёбии Гвардияи миллии Тоҷикистон рӯзи 13-уми октябр дар Душанбе гузашти низомӣ доир мегардад.

Тавре ба «Азия-Плюс» як манбаъ аз сохторҳои қудратии ҷумҳурӣ хабар дод, ин чорабинӣ дар маркази таълимии Гвардияи миллӣ доир гардида, дар он аз иштироки беш аз 4 ҳазор нафар афсарону сарбозон интизорӣ меравад.

Ба иттилои манбаъ, ба ҷуз сарбозону афсарони Гвардияи миллӣ, дар гузашти низомӣ ҳамчунин воҳидҳои ҷудогонаи ВКД, Вазорати мудофиа, нерӯҳои марзбонӣ ва дигар сохторҳои қудратии ҷумҳурӣ низ ширкат меварзанд.

Қобили зикр аст, ки Гвардияи миллии Тоҷикистон, ки қаблан Гвардияи президентӣ ном дошт, моҳи сентябри соли 1995 таъсис  дода шуд. Моҳи январи соли 2004 Гвардияи президентӣ ба Гвардияи миллӣ табдили ном кард.