Зимни гуфтугӯи мустақим бо шаҳрвандон дар идораи ҳафтавори «Тоҷикистон» вазири корҳои дохилии Тоҷикистон Рамазон Раҳимзода бори нахуст аз шумори тоҷикистониёни ҳалокшуда дар амалиётҳои ҷангӣ алайҳи ҳукумати Башор Асад дар Сурия иттилоъ дода, зикр кард, ки тибқи маълумоти ахир, айни замон дар ин даргириҳо Сурия зиёда аз 200 нафар шаҳрвандони кишвар иштирок дошта, шумори тоҷикистониёни кушташуда 50 нафарро ташкил медиҳад.

Ба гуфтаи ӯ, феълан нисбати 19 нафар мутобиқи моддаи 187-и Кодекси ҷиноии ҶТ (Ташкили иттиҳоди  ҷиноятӣ (ташкилоти ҷиноятӣ) парвандаи ҷиноӣ боз шуда, нисбати 12 нафар маълумот ҷамъоварӣ ва барои оғози парвандаи ҷиноӣ ба мақомоти тафтишот ирсол шудааст.

Дар ҳамин ҳол, муфтиёти Тоҷикистон иштирок дар амалиётҳои ҷангӣ дар хориҷи кишварро «гуноҳи бузург» номида, ба сулҳу созиш дар дохили кишвар даъват мекунад.

Чанде қабл покуратураи вилояти Суғд дар бораи боздошти 10 нафар сокинони вилояти Суғд, ки нияти иштирок дар даргириҳои Сурияро доштанд, хабар дод. Санаи 26-уми сентябр нахуст 2 нафари онҳо боздошт ва сипас тибқи нишондодҳои боздоштшудагон боқимонда 8 нафари дигар дастгир шуданд.

Ҳукумати Тоҷикистон аз ҷавононе, ки дар даргириҳои Сурия иштирок доранд, даъват ба амал овард, ки бидуни ҳеҷ ҳаросе аз ҷавобгарии ҷиноятӣ ба ватан баргарданд ва ба ҳаёти осоиштаашон идома диҳанд. Дар қонун пешбинӣ шудааст, ки дар сурати ба Тоҷикистон ихтиёрӣ баргаштану ба ҳукуматдорон таслим шудан, онҳо аз ҷавобгарии ҷиноятӣ озод карда мешаванд.