Ҳайати низомиёни Фаронса бо шумори 170 нафар сарбозону афсарон, ки тайи 12 соли ахир дар қаламрави Фурудгоҳи байнулмилалии Душанбе (ФБД) мустақар буданд, пойтахти Тоҷикистонр тарк карданд.

Котиби матбуотии ФБД Муҳаммадюсуф Шодиев ба «Азия-Плюс» ин маълумотро тасдиқ намуда, зикр кард, ки қаблан тамоми техникаи мавҷуда ва таҷҳизоти мутааллиқ ба низомиёни фаронсавӣ низ аз қаламрави фурудгоҳ бароварда шуданд.

Хизматчиёни ҳарбии Фаронса ба сифати воҳиди ёрирасон дар ҳайати нерӯҳои низомии Созмони Аҳдномаи Атлантикаи Шимолӣ (НАТО), ки аз моҳи сентябри соли 2001 дар Афғонистон амал мекарданд, дар фурудгоҳ мустақар шуда буданд.

Зимнан зикр гардид, ки дар маросими поин овардани парчами Фаронса дар фурудгоҳи пойтахт намояндагони Тоҷикистон ҳузур доштанд.