Ахири ҳафтаи сипаришуда вазири корҳои дохилии Тоҷикистон Раҳимзода Рамазон Ҳамро бо Роҳбари Намояндагии Раёсати Олии Комиссариати СММ оид ба гурезаҳо дар Тоҷикистон Кевин Аллен вохӯрӣ анҷом дод.

Бино ба иттилои маркази матбуоти ВКД ҶТ, зимни вохӯрӣ ҷонибҳо масъалаҳои ҳамкориҳоро дар самти кор бо гурезаҳо, ашхоси бетабаа ва ба паноҳгоҳ эҳтиёҷдошта мавриди баррасӣ қарор доданд.

Вазири корҳои дохилӣ Рамазон Раҳимзода зимни суханронӣ қайд намуд, ки Ҳукумати Ҷумҳурии Тоҷикистон ҳамеша ба гурезаҳо ва шахсони паноҳҷӯянда таваҷҷӯҳи хоса зоҳир намуда, баҳри ҳимояи ҳуқуқу инсон ва шаҳрванд тадбирҳои зарурӣ меандешад.

Дар ин радиф мақомоти корҳои дохилӣ омода аст дар самтҳои зикргардида бо Намояндагии Раёсати Олии Комиссариати СММ оид ба гурезаҳо дар Тоҷикистон дар чаҳорчӯби қонунгузорӣ ҳамкорӣ намояд.

Дар навбати худ роҳбари Намояндагии Раёсати мазкур Кевин Аллен ба Вазири корҳои дохилӣ барои пазироии самимӣ ва ҳамкориҳои мутақобилан судманд изҳори миннатдорӣ баён намуд.