Сардори Сарситоди нерӯҳои марзбонии Тоҷикистон Ҳабибулло Сафаров ва муовини аввали сардори Хадамоти давлатии марзбонии Қирғизистон Искадар Мабеталиев чанде қабл дар қаламрави деҳоти Жаштики ноҳияи Лайлаки кишвари ҳамсоя мулоқот карданд.

Тавре як манбаъ аз ҳукумати вилояти Суғд хабар дод, дар мулоқот масоили пурзӯр кардани назорат дар хатти марз, роҳ надодан ба сар задани муноқишаҳо ва тақвияти ҳамкориҳо дар ин самт баррасӣ шуданд.

Ҷонибҳо дар бораи бунёди як постгоҳи сарҳадӣ дар мавзеи Овчӣ Қалъачаи ноҳияи Бобоҷон Ғафуров ва ноҳияи Лайлаки вилояти Ботканд тавофуқ ҳосил карданд.

Қобили зикр аст, ки соли равон дар марзи Тоҷикистону Қирғизистон якчанд муноқишаҳои мусаллаҳона рух дода, бар асари онҳо сокинони маҳалливу марзбонони ҳарду ҷониб захмӣ ва ҳалок шуданд.