Шаҳрванди Ӯзбекистон, ки барои ташкили гурӯҳи ҷиноятпеша ва терроризм, мавриди ҷустӯҷӯи байнулмилалӣ қарор дошт, бо шиносномаи тоҷикӣ марзи Беларусро гузаштанӣ шуд.

Бино ба маълумоти хадамоти матбуоти Кумитаи давлатии марзбонии Беларус, дар Фурудгоҳи миллии «Минск» зимни анҷоми расмиёти сафари мусофирони хатсайри Минск – Истамбул санаи 28-уми декабр як марди мусофир худро шаҳрванди Тоҷикистон муаррифӣ намуда, ҳангоми санҷиши ҳуҷҷатҳо маълум шудааст, ки дар шиносномаи ӯ акс иваз карда шудааст.

«Баъдтар маълум гардид, ки шаҳрванди 31-солаи Ӯзбекистон ғайриқонунӣ марзи давлатиро убур карданӣ буд. Аз моҳи июни соли 2013 ин мард барои ташкили гурӯҳи ҷиноятпеша ва терроризм мавриди ҷустуҷӯи байнулмилалӣ эълон шудааст», - иттилоъ медиҳад манбаъ.

Гуфта мешавад, марде, ки ғайриқонунӣ марзро убур карданӣ буд, боздошт шуда, дар мавриди ӯ таҳқиқот идома дорад.