Вазорати корҳои дохилии Ҷумҳурии Тоҷикистон ба диққати шаҳрвандон мерасонад, ки аз 1-уми январи соли 2015 тамоми шаҳрвандоне, ки ба муҳоҷирати меҳнатӣ ба Федератсияи Россия мераванд ва ё ба дигар давлатҳо сафар менамоянд, танҳо бо шиносномаи хориҷӣ метавонанд сафар кунанд.

Бино ба маълумоти маркази матбуоти ВКД Тоҷикистон, бо фармони вазири корҳои дохилии Тоҷикистон генерал-лейтенанти милитсия Раҳимзода Рамазон Ҳамро дар шаҳри Душанбе ва тамоми вилоятҳои ҷумҳурӣ навбатдории 24-соата барои мусоидат намудан ба шаҳрвандон барои гирифтани шиносномаҳои хориҷӣ ташкил карда шуд, аз он ҷумла дар Хадамоти шиносномавию бақайдгирии Вазорати корҳои дохилӣ низ.

Гуфта мешавад, ҳамчунин ба тамоми хадамотҳои шиносномавию бақайдгирии вилоятҳо, шаҳру ноҳияҳо ва ҷузъу томҳои он дар тамоми манотиқи ҷумҳурӣ супориш дода шуд, ки ҳуҷҷатҳои шаҳрвандонро дар ҳамкорӣ бо Вазорати корҳои хориҷии Ҷумҳурии Тоҷикистон омода сохта, саривақт  ба шаҳрвандон дастрас намоянд.