Вазири корҳои дохилии Тоҷикистон Рамазон Раҳимзода ҳар се моҳ ба арзу шикоят ва мушкилоти тобеъонаш шахсан расидагӣ мекунад.

Бино ба маълумоти сомонаи расмии ВКД ҶТ,  ин иқдом бо мақсади огоҳӣ пайдо намудан аз фаъолият ва ҳифзи иҷтимоии ҳайати шахсии мақомоти корҳои дохилӣ реҷаи қабули кормандон аз ҷониби вазири корҳои дохилӣ ба роҳ монда мешавад, ки кормандони мақомоти корҳои дохилӣ метавонанд бевосита мушкилоти худро ҳаллу фасл намоянд.

«Вазир тобеъони худро ҳар се моҳ як маротиба рӯзҳои шанбе тибқи нақшаи тасдиқшуда рӯзҳои 7 март, 6 июн, 5 сентябр ва 5 декабри соли равон аз соати 8 то 9 қабул мекунад», - зикр мегардад дар сомонаи расмии ВКД ҶТ.

Гуфта мешавад, шанбеи якуми ҳар моҳ аз ҷониби вазири корҳои дохилӣ генерал-лейтенанти милитсия Раҳимзода Рамазон Ҳамро шаҳрвандон қабул гардида, арзу шикояти онҳо мавриди баррасӣ қарор дода мешавад ва ба ҳар як корафтода аз ҷониби роҳбарияти Вазорат таваҷҷӯҳи хосса зоҳир гардида, барои ҳалли мушкилоти онҳо тадбирҳои қонунӣ андешида мешаванд.