Зимни нишасти хабарии имрӯза вазири корҳои дохилии Тоҷикистон Рамазон Раҳимзода ба журналистон иттилоъ дод, ки соли гузашта нисбати 53 нафар тоҷикистониён ба гумони иштирок дар амалиёти ҷангӣ дар қаламрави кишварҳои хориҷӣ парвандаҳои ҷиноӣ боз шудааст, ки 12 нафар аз онҳо дар Ироқу Сурия ҷангидаанд.

Вазир таъкид дошт, ки се нафар шаҳрвандони кишвар аз ҷанги Сурия ихтиёрӣ ба ватан баргашта, пас аз суҳбат бо кормандони сохторҳои дахлдор, ба озодӣ ҷавоб дода шуданд «Тибқи маълумоти ҳукумати Тоҷикистон, имрӯз дар даргириҳои Сурияву Ироқ ҳудуди 200 нафар шаҳрвандони Тоҷикистон ҳузур доранд», - гуфт Раҳимзода.

Дар посух ба саволҳои журналистон вазири корҳои дохилӣ изҳор намуд, ки нисбати хешону наздикони ин афрод ҳеҷ чорае андешида нашудааст. «Мо аз онҳо хоҳиш мекунем, ки ба мо кумак расонида, ба бозгашти онҳр ба ватан мусоидат намоянд», - иброз дошт вазир.

Номбурда ваъда дод, ки мутобиқи қонунгузории кишвар, тоҷикистониёне, ки аз амалиёти ҷангӣ дар қаламрави кишварҳои дигар ихтиёрӣ ба ватан бармегарданд, аз ҷавобгарии ҷиноятӣ озод мегарданд.