- Роҳбари созмони «Ҷавонон барои эҳёи Тоҷикистон» Мақсуд Иброҳимов ба ҳабс гирифта шуда, дар яке аз тавқифгоҳҳои муваққатии шаҳри Душанбе нигаҳдорӣ мешавад, - гуфт зимни нишасти хабарӣ сардори Раёсати назорати қонуният дар мақомоти ВКД ва АНМН-и Прокуратураи генералии Тоҷикистон Ризо Халифазода.

Ба гуфтаи ӯ, нисбати боздоштшуда мутобиқи якчанд моддаи Кодекси ҷиноии ҶТ парвандаи ҷиноӣ боз шуда, парвандаи мазкурро муфаттишони ВКД Тоҷикистон тафтиш мекунанд.

Дар Прокуратураи генералӣ қайд карданд, ки айни замон нисбати 32 нафар аъзои созмони «Гурӯҳи 24», ки моҳи октябри соли гузашта бо қарори Суди олӣ созмони ифротгаро эътироф шуда, фаъолияташ манъ шуда буд, 9 парвандаи ҷиноӣ боз шудааст.

Дар ҳамин ҳол, таъкид гардид, ки дар бораи истирдоди аъзои «Гурӯҳи 24» аз дигар кишварҳо ба Тоҷикистон Прокуратураи генералӣ маълумот дар даст надорад.

Ёдрас мекунем, ки чанде қабл дар шабакаи иҷтимоии «Фейсбук» рӯйхати аъзои дар Русия ва Тоҷикистон боздоштшудаи созмони «Ҷавонон барои эҳёи Тоҷикистон» интишор шуд.