Дар Агентии таъминоти амволи махсуси назди Ҳукумати ҶТ бо иштироки масъулини ақибгоҳии сохторҳои қудратӣ, роҳбарону намояндагони корхонаҳои истеҳсолӣ ва дигар масъулини дахлдори вазорату идораҳои давлатӣ ҷамъомад доир гардид.

Бино ба иттилои сомонаи расмии Вазорати мудофиаи ҶТ, қабл аз оғози ҷамъомади мазкур дар дохили бинои агентӣ, барои иштирокчиёни он намоишгоҳи сару либоси низомӣ, пойафзолу дигар амволи шайъӣ, маҳсулоти полезиву донагӣ ва маводи хурокворӣ, ки аз ҷониби корхонаҳои ватанӣ истеҳсол мегарданд, ташкил карда шуд.

Дар ҷамъомади вобаста ба таъминоти Қувваҳои Мусаллаҳ бо молу маҳсулот роҳҳои коркарду самаранок истифода намудани замини кишти хоҷагиҳои ёрирасон, тақвият бахшидани чорводорӣ, парвариши паранда, моҳипарварӣ ва рушди минбаъдаи корхонаҳои истеҳсолӣ мавриди таҳлилу баррасӣ ва муҳокима қарор гирифта, зимни пешниҳоди масъулини ақибгоҳии қисмҳои низомӣ ва роҳбарону намояндагони корхонаҳои истеҳсолӣ таъкид гардид, ки ба коркарди сифати маҳсулот диққати ҷиддӣ равона гардад, то талаботи хизматчиёни ҳарбии Қувваҳои Мусаллаҳи мамлакат аз ҳар ҷиҳат қонеъ шавад.

Қобили зикр аст, ки қисми зиёди талаботи сохторҳои қудратии мамлакат бо маводи хӯрока, пояфзолу амволи шайъӣ ва сару либоси низомӣ, асосан аз ҳисоби агентӣ таъмин гардида, илова бар ин, соли сипаригашта дар тобеияти он Баталиони кишоварзӣ таъсис ёфт ва ба он сарбозон тибқи даъват шомил шуда, дар хоҷагиҳои ёрирасони агентӣ кору фаъолият менамоянд.

Дар ин замина масъулини Агентии таъминоти амволи махсуси назди Ҳукумати Ҷумҳурии Тоҷикистон азм доранд, ки ояндаи наздик баҳри таъмини ҷузъу томҳои Қувваҳои Мусаллаҳи ҷумҳурӣ як қатор навовариҳоро дар самти истеҳсоли маҳсулоти гуногуни ватанӣ, дар фаъолияти худ роҳандозӣ намоянд.