Вазири корҳои дохилӣ генерал-лейтенанти милитсия Раҳимзода Рамазон Ҳамро сафири Эрон дар Тоҷикистон Ҳуҷҷатулоҳ Фағониро ба ҳузур пазируфт.

Бино ба иттилои маркази матбуоти ВКД ҶТ дар вохӯрӣ ҳамчунин Беҳзоди Рафеъӣ – вобастаи низомии сафорати Эрон дар Тоҷикистон ва Саидмӯҳсин Рашид-ул-Исломӣ – мушовири сафир ширкат варзиданд.

Гуфта мешавад, ҷонибҳо зимни мулоқот дар самти мубориза бар зидди ҷинояткорӣ, аз ҷумла терроризм, экстремизм, сепаратизм ва хариду фурӯши ғайриқонунии силоҳ табодули афкор намуда, қайд гардид, ки масъалаҳои зикргардида на танҳо Тоҷикистону Эрон, балки тамоми давлатҳои минтақаро ба ташвиш овардааст.

«Дар ин масоил Вазорати корҳои дохилии Тоҷикистон ва Вазорати кишвари Эрон равобити зичи ҳамкориҳоро роҳандозӣ намудаанд», - омадааст дар итттилои ВКД ҶТ.  

Зимнн зикр мегардад, ки дар хотимаи мулоқот тарафайн аз рушду нумӯъ ёфтани ҳамкориҳои мутақобилан судманд изҳори қаноатмандӣ намуданд.