Дар қисми ғарбии Ироқ ҷангиёни гурӯҳи «Давлати исломӣ» боз 45-нафарро оташ заданд. Ҷангиён онҳоро дар ҳамкорӣ доштан бо низомиёни Ироқ гумонбар дониста, ба коми оташ додаанд. То ҳол шахсияти қурбониёни ин фоҷеа маълум карда нашудааст. Аз рӯйи баъзе фарзияҳо онҳо кормандони мақомоти қудратии Ироқ мебошанд.

Бино ба иттилои сомонаи телевизиони «Ҷаҳоннамо», ин ҳодисаи мудҳиш дар шаҳри Эл-Бағдодӣ рух додааст. Расонаҳои хабарӣ дар бораи ин ҳодиса то ҳол ҷузъиёти муфассалро дастрас накардаанд.

Зикр мегардад, ки шаҳри номбурдаро гурӯҳи «Давлати исломӣ» 12-уми феврал пурра зери тасарруфи худ гирифта буданд. Қаблан ҷангиёни гурӯҳи «Давлати исломӣ» ба яке аз пойгоҳҳои низомии «Айн-Ал-Асад», воқеъ дар наздикии шаҳри Эл-Бағдоди ҳамла карда, ба муқовимати шадиди неруҳои қудратӣ дучор омадаанд. Ҳангоми бархӯрди мусаллаҳона 8 нафар ҷангиёни гурӯҳи «Давлати исломӣ» ба ҳалокат расиданд.

Ёдрас мешавад, ки 15-уми феврали соли ҷорӣ гурӯҳи «ДИ», ки дар ҳудуди Либия фаъоланд наворҳои ба қатл расондани 21 нафар масеҳиёни қабилаи қипити Мисрро дар шабакаи интернет интишор карда буданд. Онҳоро ҷангиёни ифротӣ охирҳои моҳи сипаригардида, асир гирифта буданд.