Собиқадори мақомоти амнияти давлатӣ, коршиноси мустақили тоҷик оид ба масоили инъикоси терроризм Давлатхоҷа Назиров чунин мешуморад, ки абарқудратони имрӯз, кишварҳое ба монанди ИМА ва Русия ба бештар роиҷ гардидани ба истилоҳ пешгӯиҳо барои минтақаи Осиёи Марказӣ, асосан Тоҷикистон дар бораи оқибати таҳдидҳои созмонҳои террористие чун Давлатии исломии Ироқу Шом (ДИИШ) ва ҳаракати Толибон манфиатдоранд.

Дар мусоҳиба ба «Азия-Плюс» номбурда дар ин робита изҳор намуд, ки ҳадафи аслии паҳнкунии ин пешгӯиҳо дар бораи таҳдидҳои беруна, ки ба амнияти Тоҷикистон хатар эҷод мекунанд, нарму гапдаро кардани кишвари мо дар роҳандозии масъалаҳои сиёсати минтақавӣ аст.

«Ҳама гуна навъи террористон ба хубӣ огаҳанд, ки аз амнияти Тоҷикистон дар баробари қувваҳои мусаллаҳи миллӣ ҳамчунин пойгоҳи низомии 201-уми Русия дар Тоҷикистон, кишварҳои узви СААД ва дар баъзе ҳолатҳо кишварҳои узви СҲШ низ ҳимоят мекунанд ва танҳо аблаҳ метавонад бо чунин нерӯҳо ҷанг эълон кунад. ДИИШ ва Толибон дуртар аз Афғонистон қадам намегузоранд», - мутмаин аст коршинос.

Коршинос ҳамчунин илова намуд, ки кайҳост, ки дар қаламрави Афғонистону Покистон пайдо шудани гурӯҳи Хуросони ДИИШ ба қайд гирифта шуда, тӯли солҳои зиёде Толибон он ҷо меҷанганд, вале маротибае ҳам онҳо ба ҳаракат ба дуртар аз ин қаламрав, ба Осиёи Миёна талош наварзидаанд.