Даргирӣ миёни нерӯҳои амниятии Афғонистон ва Толибон дар вилояти Бадахшони Афғонистон бо талафоти сангини ҷангҷӯёни Толибон поён ёфтааст, хабар медиҳад “ Хома ”.

Масъулони амниятии вилояти Бадахшон ба хабаргузории “Хома” гуфтаанд, дар даргирии ду рӯзи ахир миёни нерӯҳои амниятӣ ва Толибон дар дараи Хастаки ноҳияи Ҷурми ин вилоят 27 нафар аз Толибон кушта шудаанд.

Сахидод Ҳайдарӣ, масъули амниятии вилояти Бадахшон гуфтааст, ки 8 нафар аз ин кушташудагон ҷангҷӯёни хориҷӣ ва аз Тоҷикистон мебошанд. «Дар ин даргирӣ 6 нафар аз неруҳои амниятии афғон низ кушта ва 12 нафари онҳо захмӣ шудаанд», - хабар додааст “Хома”.

Қобили зикр аст, ки Ии даргирӣ рӯзи 10-уми апрел оғоз шуда то поёни рӯзи 11-уми апрел давом кардааст.

Вилояти Бадахшони Афғонистон яке аз вилоятҳоест, ки бо Покистону Тоҷикистон ҳаммарз аст. Ва ба навиштаи ин хабаргузорӣ, вилояти Бадахшони Афғонистон ноҳияҳои Вахон, Ишкошим, Шуғнон ва минтақаи Дарвозро дар бар гирифта, бо Тоҷикистон ҳаммарз аст ва то кунун борҳо аз ҳузури талафоти ҷангҷӯёни тоҷикистонӣ дар он гузориш шудааст.