Мақомоти ҳифзи ҳуқуқи Тоҷикистон сокини ноҳияи Шаҳритӯс Ҳусейн Одинамаҳмадов, бештар маъруф бо лақаби «Қорӣ Ҳусейн»-ро ба гумони даст доштан дар сафарбарии ҷавонони тоҷик ба Сурия тариқи қаламрави Туркия боздошт намуданд.

Тибқи иттилои расида аз як манбаъи «Азия-Плюс» дар мақомоти ноҳияи Шаҳритӯс, «Қорӣ Ҳусейн» ҳудуди як моҳ пеш дар шаҳри Маскав боздошт ва ба Тоҷикистон истирдод шуда, айни замон дар тавқифгоҳи муваққатии шаҳри Қӯрғонтеппа қарор дорад. Ба иттилои манбаъ, ӯ дар шаҳри Маскав се нафар шаҳрвандони Тоҷикистонро барои сафарбарии минбаъда ба ҷанги Сурия ба Туркия фиристодааст.

Манбаъи «Азия-Плюс» дар мақомоти интизомии вилояти Хатлон маълумоти боздошти «Қорӣ Ҳусейн»-ро тасдиқ намуда, вале аз пешниҳоди маълумот бобати дар куҷову чӣ гуна боздошт шудани ӯ худдорӣ варзид ва қайд кард, ки нисбати боздоштшуда парвандаи ҷиноӣ боз гардида, тафтишоти пешакии ин парванда ба уҳдаи муфаттишони Кумитаи давлатии амнияти миллӣ вогузор шудааст.