Вазири корҳои дохилӣ генерал-лейтенанти милитсия Раҳимзода Рамазон Ҳамро бо ҳайати Вазорати бехатарии ҷамъиятии Ҷумҳурии Мардумии Чин таҳти роҳбарии сардори Департаменти бехатарии ҷамъиятии  Вазорати мазкур Лю Шаоу дидору гуфтушунид кард.

Бино ба иттилои маркази матбуоти ВКД ҶТ, зимни мулоқот зикр гардид, ки ҳамкориҳои байни Вазоратҳои корҳои дохилии ду кишвари ба ҳам дӯсту ҳамсоя дар сатҳи баланд қарор дошта, дар асоси Созишнома оид ба ҳамкорӣ байни Вазорати корҳои дохилии и Тоҷикистон ва Вазорати бехатарии ҷамъиятии Чин, ки 27 майи соли 2002 дар шаҳри Душанбе ба имзо расидааст, амалӣ карда мешаванд.

Дар вохӯрӣ масъалаҳои мубориза бар зидди таҳдиду хатарҳои ҷаҳони муосир, аз қабили  терроризм, экстремизм, сепаратизм, гардиши ғайриқонунии маводи мухаддир, силоҳ ва дигар ҷиноятҳои муташаккили фаромиллӣ мавриди баррасӣ қарор гирифтанд.

Ҷонибҳо доир ба гузаронидани машқҳои якҷояи тактикии зиддитеррористӣ дар шароити кӯҳсор ибрози андеша намуда, қайд карданд, ки баргузории чунин машқҳои якҷояи тактикӣ боз як қадами муҳим барои дар ҳамбастагию ҳамкорӣ мубориза бурдан бо ҷинояткорӣ ва зуҳуроти номатлуб аст.

Дар хотимаи вохӯрӣ бори дигар таъкид гардид, ки ҷомеаи ҷаҳонӣ метавонад, танҳо дастаҷамъона ва дар якҷоягӣ бо хатару таҳдидҳои ҷаҳони муосир мубориза барад.