Дар доираи санҷиши ногаҳонии эълоншуда аз ҷониби Шӯрои амнияти дастаҷамъии Созмони Аҳдномаи амнияти дастаҷамъӣ (СААД), ки мутобиқи он ҷузъу том ва воҳидҳои низомӣ аз ҳайати Нерӯҳои зудамали Созмон рӯзи 12 май ба ҳолати омодабоши ҷангӣ оварда шуданд, ҷараёни интиқоли ҳайати шахсӣ ва техника ба минтақаи омодабоши ҷангӣ, ба қаламрави Тоҷикистон дар арафаи анҷомёбист.

Сухангӯи Вазорати мудофиаи Тоҷикистон Фаридун Маҳмадлиев ба «Азия-Плюс» дар ин робита иттилоъ дод, ки воҳидҳои низомии задамали кишварҳои Беларус, Қазоқистон ва Русия, ки аз воҳидҳои қушӯнҳои десанти ҳавоии Русия, Нерӯҳо барои амалиёти махсуси Беларус ва қушунҳои автомобилии Қазоқистон иборатанд, пас аз анҷоми амал тибқи эълони «бонги хатар» бо лавозимоти ҳарбӣ ва техника шаби 13 май тариқи ҳавопаймоҳо ба фурудгоҳҳои шаҳрҳои Қӯрғонтеппа ва Душанбе омаданд.

Воҳидҳои низомии Нерӯҳои зудуамали Тоҷикистон ва Қирғизистон дар СААД тариқи минтақаи кӯҳистон якчанд километр масофаро тай мекунанд. Воҳиди таъиноти махсуси Қувваҳои Мусаллаҳи Арманистон дар ҳайати Нерӯҳои зудамали СААД имрӯз тавассути авиатсияи низомӣ-нақлиётӣ ба Тоҷикистон интиқол дода мешаванд.

Гурӯҳи фаврии афсарони Ситоди муттаҳидаи СААД таҳти сарварии сардори ситод генерал-лейтенант Александр Студеникин ҷиҳати ҳамоҳангсозии амалиёти ҷобаҷокунии воҳидҳои низомӣ, таъсиси мақомоти идоракунии Нерӯҳои зудамали Созмон ва таъмини иҷрои вазифаҳои таълимиву ҷангӣ ба минтақаи ҳолати омодабоши ҷангӣ омаданд.

Дар ҳамин ҳол, ба гуфтаи Маҳмадалиев, танҳо рӯзи 13 май барои интиқоли ҷузъу том ва воҳидҳои Нерӯҳои зудамали СААД 24 парвози ҳавопаймоҳои авиатсияи кишварҳои узви Созмон анҷом дода шудааст, ки 19 адади ин парвозҳоро Русия, 3 ададашро - Қазоқистон ва 2 парвозро нерӯҳои Белорус ба иҷро расонидаанд.