Шаби 4 ба 5 июн марзбонони тоҷик ду кӯшиши убури марзи давлатӣ аз ҷониби қочоқбарони афғонро пешгирӣ намуданд.

Сухангӯи Сарраёсати Қушӯнҳои сарҳадии КДАМ Тоҷикистон Муҳаммад Улуғхоҷаев ба «Азия-Плюс» дар ин робита иттилоъ дод, ки дар қитъаи «Ҳамадонӣ»-и марз аз кӯшиши интиқоли миқдори зиёди маводи мухаддир ба Тоҷикистон ҷилавгирӣ шуда, қочоқбарони афғон дар ҷойи задухӯрди мусаллаҳона 42 кило ҳашиш ва 2 кило афюнро гузошта, ба қаламрави кишвари ҳамсоя паноҳ бурдаанд.

Ба гуфтаи ӯ, худи ҳамон шаб дар қитъаи «Панҷ»-и марз бо қочоқбарон муқовимати мусаллаҳона сурат гирифта, дар ҷойи ҳодиса ҷасади марди тақрибан 40-45-солаи афғон, автомати Калашников бо се тирдон ва 25 кило ҳашиш дарёфт шудааст.

Зимнан зикр гардид, ки аз рӯи ин ҳодисаҳо чораҳои зарурии тафтишотӣ анҷом дода мешаванд.