Рӯзи 8 июни соли 2015 дар бинои Агентии назорати маводи нашъаовар (АНМН)-и назди президенти ҶТ вохӯрии Гурӯҳи кории ҳамкорӣ ва рушди Иттиҳоди Аврупо иборат аз 25 нафар намояндагони кишварҳои Иттиҳоди Аврупо, ки онро Лига Андерсон Раиси CODEV роҳбарӣ мекард бо директори Агентӣ Рустам Назарзода баргузор гардид.          

Бино ба иттилои шуъбаи робита бо ҷомеаи Агентӣ, дар вохӯрии мазкур директори Агентӣ доир ба таъсисёбӣ ва фаъолияти Агентӣ, масъалаҳои вобаста ба вазъи нашъамандӣ дар ҷумҳурӣ ва минтақа, аз ҷумла дар Афғонистон, инчунин оид ба сиёсати зиддимухадиротии Тоҷикистон ва ташаббусҳои ҶТ дар самти назорати маводи нашъаовар дар минтақа ва ҷаҳон маълумот пешниҳод намуда, ба суолҳои намояндагони ИА ҷавобҳои мушаххас дод.

Гуфта мешавад, намояндагони кишварҳои Иттиҳоди Аврупо доир ба ин масъалаҳо мавқеъ ва андешаҳои худро иброз намуданд ва омодагии худро барои вусъат додани муборизаи муштарак баён намуданд.