Додарарӯси раиси парлумони Афғонистон аз ҷониби марзбонони тоҷик кушта шуд. Дар ин бора хабаргузории «Пажвок» иттилоъ медиҳад.

Ба иттилои манбаъ, кушташуда ба қочоқи маводи мухаддир тариқи марзи Афғонистону Тоҷикистон машғул будааст. Сиддиқ Сиддиқӣ, сухангӯи Вазорати корҳои дохилии Афғонистон дар ин робита гуфтааст, ин шахсро, ки  аз ному насабаш дар ҳеҷ куҷое хабар дода намешавад, ҳангоми убури марз дар минтақаи Имом Соҳиби вилояти Қундуз марзбонони тоҷик нобуд кардаанд.

Тибқи маълумоти хабаргузории «Қундуз нюс», дар паҳлӯи кушташуда марзбонони тоҷик 25 кило маводи мухаддир ва силоҳ дарёфт кардаанд. Ҷасади ӯ ба ҷониби Афғонистон супурда шудааст.

«Қундуз нюс» ҳамчунин менависад, афсари кушташуда додарарӯси раиси парлумони Афғонистон Абдулрауф Иброҳимӣ мебошад. Қаблан аз ҷониби вазири корҳои дохилии Афғонистон ӯ ба мансаби сардори хадамоти амният дар минтақаи Имом Соҳиби вилояти Қундуз таъин шуда буд.

Дар ҳамин ҳол, ба «Азия-Плюс» муяссар нашуд, ки аз Сарраёсати нерӯҳои марзбонии КДАМ Тоҷикистон дар ин бора маълумот дастрас намояд.