Нимсолаи аввали соли равон зимни иҷрои корҳо дар бахшҳои саноату сохтмон 3 нафар ба ҳалокат расида, 4 тани дигар ҷароҳатҳои гуногун бардоштанд.

Сардори Хадамоти назорати давлатии бехатарии корҳо дар саноат ва соҳаи кӯҳкории назди ҳукумати ҶТ Санъат Раҳим дар ин робита иттилоъ дод, ки дар ин давра аз ҷониби кормандони хадамот 7 ҳодисаи нохуш ва як садамаи истеҳсолӣ ба қайд гирифта шудааст.

«Дар сохтмони нерӯгоҳи Роғун тӯли ним сол 1 нафар ҳалок ва 1 тан ҷароҳат гирифтанд Миёни ҳалокшудагон як шаҳрванди Чин, корманди ҶДММ «Ширкати кӯҳкории Тоҷикистону Чин» ҳузур дорад», - қайд кард сардори хадамот.

Ба қавли ӯ, дар корхонаи истихроҷи ангишти «Фон-Яғноб» 2 ҳодисаи нохуш рух дода, 1 нафар ҳалок ва 1 тан ҷароҳат бардоштаанд. «Ин ҳодисаҳо бинобар сабаби риоя нашудани қоидаҳои бехатарӣ ва сатҳи пасти тахассуси касбӣ рух доданд», - гуфт номбурда.

Сардори хадамот таъкид дошт, ки дар ҷараёни санҷишҳои назорати техникӣ 114 нафар  кормандони масъули корхонаҳо бо сабаби иҷро накардани талаботи қоидаҳои бехатарии корҳо дар саноат ба ҷавобгарии маъмурӣ ҷалб ва ба сурати умум дар ҳаҷми 83,1 ҳазор сомонӣ ҷариманбандӣ шудаанд.