Дар маҷлиси тантанавӣ бахшида ба 24-умин солгарди Истиқлолияти давлатии Ҷумҳурии Тоҷикистон вазири корҳои дохилии ҷумҳурӣ, генерал-лейтенанти милитсия Раҳимзода Рамазон Ҳамро изҳор намуд, ки ба хотири таҳкими амнияту оромии шаҳрвандон, мубориза бо дастаҳои  муташаккили ҷинояткор ва гурӯҳҳои мусаллаҳи ғайриқонунӣ, инчунин рафъи хатару таҳдидҳои душманони миллат беш аз 2 ҳазор нафар кормандони мақомоти корҳои дохилӣ ҷони худро аз даст доданд, ки хотираи неки онҳо ҳеҷ гоҳ фаромӯш нахоҳад шуд.

Зимни суханронӣ вазири корҳои дохилӣ аз ҳуҷуми мусаллаҳонаи гурӯҳи ҷиноятпешаи собиқ муовини вазири мудофиа Абдуҳалим Назарзода (Ҳоҷӣ Ҳалим) ёдовар шуда, қайд кард, ки  бар асари ин ҳамла якчанд нафар кормандони милитсия ҳалок ва захмӣ гардиданд. «Ин амал хиёнат ба давлату миллат, мардуми тараққихоҳи кишвар ва ватани ободу зебо мебошад», - гуфт ӯ ва ба хешону наздикони кормандони милисаи ҳалокшуда изҳори тасаллият кард.

Дар анҷоми чорабинӣ котиби Шӯрои амнияти Тоҷикистон Абдураҳим Қаҳҳоров аз номи президенти мамлакат ба чанде аз кормандони мақомоти ҳифзи ҳуқуқ мукофотҳои давлатӣ супурд. Бо фармони Президенти кишвар се нафар кормандони милитсия соҳиби рутбаи баланди генералӣ ва 31-нафар бо ордену медалҳо қадршиносӣ гардиданд.