- Кумитаи иҷроияи Сохтори зиддитеррористии Созмони ҳамкории Шанхай (СҲШ) дастгириаш ба тадбирҳои зиддитерористии доиргардида дар Тоҷикистонро изҳор менамояд, - гуфта мешавад дар иттилои рӯзи душанбе интишоршудаи хадамоти матбуоти ин сохтори СҲШ.

«Кумитаи иҷроияи Сохтори зиддитеррористии СҲШ аз чорабиниҳои зиддитеррористии доиргардида аз ҷониби мақомоти салоҳиятдори Тоҷикистон, ки ба таъмини сулҳу субот дар кишвар равона гардида буданд, ҳимоят карда, ба тақвияти ҳамоҳангсозии амалҳои муштараки мақомоти салоҳиятдори кишварҳои узви СҲШ дар мубориза бо терроризму ҷудоиандозӣ ва ифротгароӣ омодагӣ изҳор мекунад», - зикр мегардад дар хабар.

Гуфта мешавад, нимаи ҳафтаи гузашта ВКД ва КДАМ Тоҷикистон дар бораи анҷоми амалиёти махсус алайҳи гурӯҳи мусаллаҳи ҷиноятпешаи генерали ошӯбгар Абдуҳалим Назардода хабар доданд. Тибқи маълумоти ахир, дар ҷараёни амалиёт 27 аъзои гурӯҳи террористӣ кушта ва 130 нафари онҳо боздошт шуданд.

Қобили зикр аст, ки давлатҳои Қазоқистон, Қирғизистон, Чин, Русия, Тоҷикистон ва Ӯзбекистон аъзои СҲШ буда, Афғонистон, Ҳиндустон, Эрон, Муғулистон ва Покистон кишварҳои нозири Созмон ва Беларусу Шри-Ланка ва Туркия шарикон оид ба муколама дар Созмони ҳамкории Шанхай мебошанд.