Рӯзи 24 сентябр, дар рӯзи таҷлили Иди саиди Қурбон вазири корҳои дохилии Тоҷикистон генерал-лейтенанти милитсия Раҳимзода Рамазон Ҳамро ба Маркази миллии тиббии «Қарияи Боло» дар шаҳри Душанбе ташриф оварда, аз ҳолу аҳвол ва саломатии кормандони Дастаи таъиноти махсуси ВКД ва ШВКД дар шаҳри Ваҳдат, ки зимни ҳуҷуми мусаллаҳона ва амалиётҳои махсуси зидди гурӯҳи террористии А.Назарзода маҷрӯҳ гардидаанд, хабар гирифт.

Бино ба иттилои маркази матбуоти ВКД Тоҷикистон, вазир онҳоро бо Иди Қурбон табрик гуфта, ба онҳо шифои комил хост. Ҳамзамон зимни аёдат ва дидорбинӣ аз номи ҳукумати кишвар ва Вазорати корҳои дохилӣ ба маҷрӯҳон тӯҳфаҳои идона ва маблағи пулӣ тақдим карда шуданд.

Зимнан қайд гардид, ки кормандони мақомоти корҳои дохилӣ  таҳти дастгирию ғамхории  пайвастаи президенти кишвар Эмомалӣ Раҳмон қарор дошта, ба онҳо кӯмаки ҳамаҷониба расонида хоҳад шуд.