Собиқ фармондеҳи Дастаи таъиноти махсуси милиса (ОМОН)-и ВКД Тоҷикистон Гулмурод Ҳалимови 40-сола, ки моҳи апрели соли равон ба сафҳои Давлати исломӣ пайваст, ба рӯйхати террористони таҳти таҳрими ИМА шомил шуд.

Бино ба маълумоти департаменти давлатии ИМА, рӯзи 29 сентябр ҳукуматдорони ин кишвар нисбати 35 созмону ташкилотҳо ва шахсони воқеъӣ, ки ба ин ё он гунае ба фаъолияти Давлати исломӣ алоқамандие доранд, таҳҳримҳо ҷорӣ намуд.

Миёни созмону ташкилотҳо воҳидҳои Давлати исломӣ дар Қафқози Шимолӣ, Алҷазоир,Миср ва чанде дигар давлатҳо ва дар байни террористон шаҳрвандони Фаронса, Британияи Кабир, Тоҷикистон, Покистон, Арабистони Саудӣ, Ямае ва дигар давлатҳо зикр шудаанд.

Суратҳисобҳо ва моликияти созмону ташкилотҳо ва афроди дар ин рӯйхат зикршуда дар ИМА баста ва муносибатҳои кории ширкатҳои амрикоӣ бо онҳо манъ аст.

Шаҳрванди Тоҷикистон Гулмурод Ҳалимов, ки айни замон дар Сурия аст, низ дар ин рӯйхат ҳузур дорад. Фармондеҳи 40-солаи ОМОН-и ВКД Тоҷикистон ахири моҳи апрел бедарак шуда, ба кор намебаромад ва макони будубошаш ҳам ба касе маълум набуд. Дар шабакаҳои иҷтимоӣ рӯзи 28 май нахустин навори видеои муроҷиати Г.Ҳалимов пайдо шуд, ки дар он ӯ ба нишони эътироз аз маҳдудиятҳо дар адои расму оинҳои динӣ, аз пайвастанаш ба Давлати исломӣ хабар дод. Ӯ ҳамчунин ваъда дод, ки боз ба Тоҷикистон бармегардад, то ки дар он ҷо қонунҳои шариатро ҷорӣ намояд.

Прокуратураи Тоҷикистон нисбати Г.Ҳалимов ба иттиҳоми хиёнат ба давлат, иштирок дар иттиҳоди ҷиноятӣ, иштироки ғайриқонунӣ дар низоъҳои мусаллаҳона дар қаламрави кишварҳои дигар ва ҳамчунин зархаридӣ парвандаи ҷиноӣ боз намуда, ӯ тариқи Интерпол мавриди ҷустуҷӯ эълон шуд

Гулмурод Ҳалимов хатмкардаи Акдемияи олии ВКД буда, соли 2012 фармондеҳи ОМОН-и ВКД таъин карда шуд. Тӯли хизмат дар ин сохтор ӯ борҳо ба мукофотҳои давлатӣ сарфароз гаштааст. Якчанд маротиба Ҳалимов дар доираи барномаи табодули таҷриба дар Русия ва ИМА таҷриба андӯхта, аз санҷишҳои ҳукумати кишвар низ гузашта буд. Ҳамсар ва 8 фарзанди Ҳалимов дар ватан қарор доранд.