Аз Вазорати мудофиаи Русия ба хабаргузории «Интерфакс»   итттилоъ додаанд, ки имконоти ҷангии пойгоҳи низомии 201-ум дар Тоҷикистон бо авиатсияи чархболҳо пурзӯр карда мешавад.

Намояндаи расмии Ҳавзаи ҳарбии марказӣ полковник Ярослав Рошупкин рӯзи 7 сентябр дар ин робита изҳор доштааст, ки Русия ба пойгоҳи низомии 201-ум дар Тоҷикистон чархболҳои навъи Ми-24П ва Ми-8МТВ интиқол медиҳад.

«Гуруҳи авиатсионии ташкилшуда дар ноҳияи Ҳисори Тоҷикистон, фурудгоҳи Айнӣ, 30 километр дуртар аз Душанбе ҷойгир хоҳад шуд. Ба ҳайати ин гурӯҳ чарболҳои зарбазани Ми-24П ва чархболҳои нақлиётиу ҷангии Ми-8МТВ дохиланд», - гуфтааст ӯ.

Ба гуфтаи Рошупкин, ин чархболҳо ба ҳамлу нақли бору маҳсулот, таъмини ҳимояи қатораҳои воҳидҳои низомӣ, партоби десант, гузоштани монеъаҳои минаву таркишот, ба ҷойи бехавф кӯчонидани беморону маҷрӯҳон ва иктишофи муҳандисиву ҳавоии маҳал машғул хоҳанд шуд.