Дар Маркази таълимии Агентии назорати маводи нашъаовари назди Президенти ҶТ курсҳои такмили ихтисоси кинологҳо оғоз гардиданд, ки якуним моҳ давом меёбанд.

Бино ба иттилои шуъбаи робита бо ҷомеаи Агентӣ, дар курси омӯзишӣ мутахассисони соҳаи кинологияи АНМН-и назди Президенти ҶТ, Сарраёсати Қӯшунҳои сарҳадии Кумитаи давлатии амнияти миллии ҶТ, Хадамоти гумрук ва Вазорати корҳои дохилаи ҶТ иштирок менамоянд.

Гуфта мешавад, иштирокчиён дар курси мазкур назарияи омӯзиши сагҳо, қоидаҳои асосии нигоҳ доштан ва ғизо додан ба сагҳо, риояи талаботи бехатарӣ ҳангоми ром кардани сагҳои хизматӣ, омӯзонидани саги хизматӣ бо истифодаи лавозимоти махсус барои ромкунӣ, мустаҳкам намудан ва тақвият бахшидан ба рефлекси саги хизматӣ ба дарёфти маводи нашъаовар ва машқҳои гуногунро меомӯзанд. Инчунин дарсҳои назариявӣ ва амалӣ дар самти дарёфти 5 намуди маводи нашъаовар бо истифода аз сагҳои хизматӣ гузаронида мешаванд.

Зимнан зикр мегардад, ки баъд аз хатми курси омӯзишӣ ба иштирокчиён сертификатҳо супорида мешавад.