Аз рӯи натиҷаҳои машқҳои бузургмиқёси низомии «Ҳифз-2015», ки имрӯз дар қаламрави Душанбе ва ноҳияҳои тобеи марказ ба итмом мерасанд, Вазорати мудофиаи ҷумҳурӣ иштирокчиёни фаъоли онро қадрдонӣ хоҳад кард. Дар ин бора ба «Азия-Плюс» котиби матбуотии Вазорати мудофиаи ҶТ Фаридун Маҳмадалиев хабар дод.

Ёдрас мекунем, ки машқҳо аз ҷониби Ситоди кулли Қувваҳои Мусаллаҳи Тоҷикистон бо иштироки беш аз 40 ҳазор нафар кормандони муассисаҳои давлатӣ, сохторҳои қудратӣ ва сарбозону афсарони эҳтиётии артиши миллӣ барпо мешаванд.

Ба қавли Маҳмадалиев, раҳбарияти Вазорати мудофиа ба иштирокчиёни фаъоли машқҳо медалу грамота ва туҳфаҳои арзишманд тақдим намуда, ба афсарони эҳтиётӣ рутбаҳои нави ҳарбӣ дода мешаванд.

Давраҳои омӯзишӣ ва машқҳо дар доираи иҷрои Фармони президенти Тоҷикистон, Сарфармондеҳи Қувваҳои Мусаллаҳи ҷумҳурӣ Эмомалӣ Раҳмон «Дар бораи тасдиқ ва амалисозии нақша оид ба ташкили мудофтраи қаламрав» гузаронида мешаванд.

Дар ин чорабиниҳо тарзу усулҳои ташкили мудофиаи қаламрав, даъват ва сафарбарии сарбозону афсарони эҳтиётии мудофиаи миллӣ ва ҳамчунин машқҳои фармондеҳӣ-тактикии фаврии зиддитеррористӣ мавриди омӯзиш ва иҷро қарор мегиранд.

Ба ин машқҳо баталйони тактикии воҳиди зудамали Вазорати мудофиаи Тоҷикистон дар водии Рашт, 10 адад авиатсияи ҳарбӣ ва 100 адад техникаи зиреҳпӯшу артиллерия сафарбар шудааст.