Прокуратураи генералии Тоҷикистон тирамоҳи соли ҷорӣ аз ширкати мобилии Tcell пешниҳоди дастгоҳи назорати мухобиротиро дархост намудааст. Дар ин бора дар хабари рӯзи сешанбе нашршуда дар сомонаи расмии ширкати TeliaSonera-и Шветсия ва Финландия маълумот дода мешавад.

Дар хабар қайд мешавад, ки ин дархости худро мақомоти Тоҷикистон ба дастгирии техникии сохторҳои давлатии машғул ба тафтиши рӯйдодҳои ошӯби мусаллаҳона ва ҳамчунин таҳқиқи ҷиноятҳои махсусан вазнин, ки аз ҷониби шаҳрвандони Тоҷикистон дар сафҳои созмонҳои байнулмилалии террористӣ дар қаламрави кишварҳои хориҷӣ содир шудаанд, нисбат додаанд.

Прокуратураи генералӣ дар навбати худ уҳдадор шудааст, ки ба фаъолияти тиҷоратӣ ва хоҷагидории ширкати Tcell монеъа эҷод намесозад.

Дар маълумот таъкид мешавад, ки Tcell чунин дархостҳоро танҳо дар ҳолате қонеъ менамояд, ки агар итминон ҳосил кунад, ки дастгоҳ фақат барои назорат аз болои фаъолияти ғайриқонунӣ мутобиқи қонунгузории маҳаллӣ истифода мешавад.

TeliaSonera ҳамчунин иттилоъ медиҳад, ки ба шаффофу ошкор хабар додан дар бораи ба ин монанд дархостҳои ғайримаъмулии мақомоти давлатӣ уҳдадор шудааст. «Мо ба сиёсат дахолат накарда, зимни муаррифии ширкат изҳороти сиёсӣ баён намекунем», - зикр мегардад дар маълумот.

Дар хотима гуфта мешавад, ба ҳар ҳол TeliaSonera бо ҳукуматдорон, ки ба тиҷорати ширкат дар кишварҳо таъсиргузоранду дар он ҷо манфиатҳои худро дорад, дар муколамаву гуфтушунид мебошад.