Бо истинод ба ҳукуматдорони маҳаллӣ хабаргузории ВВС иттилоъ медиҳад, ки дар мавзеи наздики фурудгоҳи пойтахти Афғонистон - шаҳри Кобул таркиш ба вуқӯъ пайваст.

Тибқи маълумоти пешакӣ, таркиш дар шоҳроҳ ба самти фурудгоҳ рух дода, мақомоти пулис бар ин назар аст, ки ин амал аз ҷониби маргталабе содир шудааст.

Ин ҳодиса соати 8-и субҳ бо вақти маҳалллӣ, каме дуртар аз Фурудгоҳи байнулмилалии Кобул ва пойгоҳи низомии НАТО ба амал омадааст. Дар ин бора хабаргузории « Пажвок » бо такя ба маълумоти намояндагони пулис иттилоъ медиҳад.

Бино ба иттилои «Афганистан.ру», фавтида аз аҳолии осоишта буда, аз ин ҳодиса боз 33 тани дигар осеб дидаанд. Миёни осебдидагон занону кӯдакон низ ҳузур доштаанд. Захмишудагон ба госпитал мунтақил шуда, ба онҳо кумаки тиббӣ расонида шудааст.

Гуфта мешавад, тафтиши ин ҳодиса оғоз гардидааст. Масъулияти ин амали террористиро намояндагони ҳаракати «Толибон» ба дӯш гирифта, изҳор доштанд, ки ҳамлаи чанде қабл ба талафот миёни нерӯҳои низомии хориҷӣ боис гардидааст.